Tekst av Paal-Helge Haugen

Paal-Helge Haugen

 

 SØSTER  SONG

(Kirsten Flagstad, Amalienborg, oktober 1946)

 

Det er så tomt i dette store huset.

Så stilt. Så mange stengde dører. Mange rom.

Det er så mange døde røyster her. Dei teier.

Eg lyttar alltid, om eg kunne høyre kva dei seier –

men dei flyg bort, og vender aldri om.

Eg går og sviv kring parkens kvite paviljong.

Der kan eg finne fjerne tonar att, i suset

frå tunge tre. Då veit eg at du ennå er her,

                                                           Søster Song

 

Dei første gule strøk av haust i alt det grøne.

Ein tidleg morgon var det rim på stein og strå.

Ei rose, raud som blod. Den tar eg inn. Det er den siste.

Ein vinter er på veg. Den kan bli større enn eg visste.

Eg låser rom for rom. Der lar eg kulden rå.


Ein liten varme her, er alt eg treng.

Litt lys                                                Ei lita lampe             og eit strikketøy

Og nål og tråd til broderi               Petit Point

 

Og bord for ein kabal                       Det hender den går opp

Eg kan dei alle               Nilen                Diplomaten

Soldat d'Afrique                           Kvar kabal i verden

Tolmod                 Tolmod                  Patience

Tolmod større enn Atlanterhavet

Eg har tid og mange kort               Eg kan begynne om igjen

Til slutt går dei nok opp                Kvar kabal i verden

Eg har tid og klokker        Urverk       Klokker over heile huset

Det store tikkande huset                med klokkene
som ruger tida ut
                                     Det kjem ei tid

 

Her er eg nå              Wotans Tochter!            Wotans Tochter!

Brünnhilde med nål og broderisaks          und ein Schwert

in Händen!         Wer wagt mich zu höhnen!          Strikketøy

Og ingen tankar                 Og krampe             I hendene

Te og småkaker         Ingen champagne     Alltid champagne

I garderoben        Og bruset frå tusen      Ti tusen

Tjue tusen      Under stjernehimmelen i Hollywood Bowl

Og rosene    Og røystene    Verehrung und Freundschaft

Meine unvergeβliche!      Glorious       Glorious

The peak of perfection                      Og så dette

 

Ein må kunne alt              Ein må kunne teie         Det er kunsten

Synge og teie             Usynleg for den som ser meg

Einsam in trüben Tagen                   Hab' ich zu Gott gefleht

Des Herzens tiefstes Klagen            Ergoβ ich im Gebet

 

Synge                    Og teie                      Langt borte

På den andre sida av musikken      På den andre sida av vinteren

Der ventar eg                              Usynleg

 

Der skal eg vente slik eg venta før ein gong

på alt eg ana då, men ikkje kunne skjøne.

Der skal eg vente til du kjem og kallar på meg,

                                                                  Søster Song 



(I teksten inngår sitat frå Wagner-operaene Lohengrin, Tristan und Isolde og Die Walküre, saman med fragment frå avisoverskrifter og eit privatbrev frå dirigenten Wilhelm Furtwängler)

Tekst til kammerverk for stemme (sopran) og eitt instrument (saksofon), musikk: Håkon Berge.

Urframført i Olavsdalen juli 2002, av Siri Torjesen og Lars Lien.
Durata: ca. 18 min.